Бараа кодын мэдээлэл

Шинэчилсэн:2024/04/30 Унших:11 мин 33 сек

Dayansoft ERP системийн цэс: Бараа материал -> Барааны код -> Шинэ

AddItemERP Барааны кодын ерөнхий мэдээллийг заавал оруулах шаардлагатай.

Бараа код - Барааны кодыг гараас оруулах шаардлагагүй бөгөөд систем автоматаар 4 оронтой кодоор дугаарладаг.
- Байгууллагын онцлог, бараа үйлчилгээний төрөлжилт зэргээс хамаарч барааны кодоо илүү олон оронтой тоо эсвэл үсэг орсон код үүсгэж гараас оруулах боломжтой
- Код нь тоон төрөлтэй тохиолдолд шинэ бараа үүсгэхэд хамгийн сүүлийн кодоос үргэлжилж автоматаар үүсдэг. Барааны код давхцаж болохгүй.
Бараа төрөл – Барааны төрлийг сонгож оруулна. Барааны төрлөөс шалтгаалж үлдэгдэл хөтлөгдөх, өртөг тооцогдох, бүртгэл хөтлөх эсэх нь хамаардаг.
- Материал - Энэ төрлийг бараа материал, түүхий эд, хангамжийн материал зэрэг худалдан авч, зарлага, үлдэгдэл хөтлөгдөх биет материаллаг бараа кодууд дээр сонгоно. Жишээ нь: Шилтэй архи, вино, чихэр, шоколад, сүү гэх мэт худалдан аваад, борлуулдаг материал болох юм.
  - Барааны үлдэгдэл хөтлөгдөнө.
  - Өртөг тооцогдоно.
  - Худалдан авна. (Дотоод орлого авна).
  - Борлуулна. (Дотоод зарлага гаргана).
  - Дотоод хөдөлгөөн хийж болно.
- Бүтээгдэхүүн - Байгууллага өөрөө үйлдвэрлэдэг бэлэн бүтээгдэхүүн дээр энэ төрлийг сонгоно. Жишээ нь: Тортны үйлдвэрийн хувьд торт, Хувцасны үйлдвэрийн хувьд өмд, цамцны нэр төрөл тус бүрээр
  - Барааны үлдэгдэл хөтлөгдөнө.
  - Өртөг тооцогдоно.
  - Худалдан авна. (Дотоод орлого авна).
  - Борлуулна. (Дотоод зарлага гаргана).
  - Үйлдвэрлэлээс орлого авна.
  - Дотоод хөдөлгөөн хийж болно.
- Үйлчилгээ - Биет бус, service буюу үйлчилгээнүүд, үлдэгдэл хөтлөгдөх боломжгүй бараа дээр энэ төрлийг сонгоно. Жишээ нь: Такс, караокены цаг, кофе, хоол, задгай пиво, 50 гр архи гэх мэт.
  - Барааны үлдэгдэл хөтлөгдөхгүй.
  - Өртөг тооцогдохгүй. Гэхдээ борлуулалтын тайлангаас тухайн барааны орц норм, технологийн картанд үндэслэж өртгийг хийсвэрээр тооцоолж харуулах боломжтой.
  - Худалдан авахгүй. (Цаашид үйлчилгээ худалдан авдаг болно.)
  - Борлуулна.
  - Дотоод зарлага хийх боломжгүй.
  - Дотоод хөдөлгөөн хийх боломжгүй.
Кофешоп, ресторан, хоолны газар зэрэг хэрэглэгчийн захиалгын дагуу бэлэн бүтээгдэхүүн үйлдвэрлээд зарж буй бизнес нь нэг утгаараа үйлдвэрлэл эрхэлж буй бөгөөд хоол, кофе, салад зэрэг нь “Бүтээгдэхүүн” төрөлтэй байх ёстой боловч ийм төрлийн бизнес дээр үйлдвэрлэлийн модуль хөтлөх нь нүсэр, түвэгтэй байдаг. Иймд хялбаршуулсан журмаар “Үйлчилгээ” хэлбэрээр бүртгэдэг ба орц норм тохируулж, зөвхөн шууд материалын зардлыг өртөг шингээх, бусад зардлыг бүтээгдэхүүний өртөгт шингээлгүй, тусад нь зардлын дансаар хөтөлж бүртгэхийг зөвлөдөг. Иймд үйлчилгээний цэгт хийж борлуулдаг бүх төрлийн хоол, уух зүйл, сет зэрэг барааны кодын хувьд Үйлчилгээ төрлийг сонгоно уу!

Бараа кодоор гүйлгээ хөтөлсний дараа Бараа төрөл-г солих боломжтой. Гэхдээ энэ нь таны бүртгэл, барааны үлдэгдэл, өртөг зэрэгт нөлөөлнө гэдгийг ойлгох хэрэгтэй. Төрөл бүр өөр өөрийн онцлогтой. Жишээ нь, үлдэгдэл хөтлөх, өртөг тооцох, худалдан авч болох эсэх, хөдөлгөөн хийж болох гэх мэт. Хэрэглэгчдийн түгээмэл гаргадаг алдаа нь. Материал эсвэл Бүтээгдэхүүн төрөлтэй код үүсгээд тухайн кодоор орлого авч, эхний үлдэгдэл оруулсны дараа тухайн бараа кодын төрлийг Үйлчилгээ болгох гэж оролддог. Энэ үед програмаас "Энэ бараа үлдэгдэлтэй байна. Үйлчилгээ төрөлтэй барааны кодын хувьд үлдэгдэл хөтлөхгүй тул эхний үлдэгдэл, орлогын гүйлгээг зассаны дараа төрлийг солино уу." алдааны мессэж харуулдаг. Хэрвээ алдаа гаргаж Үйлчилгээ төрөлтэй байх кодыг андуурч Материал эсвэл Бүтээгдэхүүн төрөлтэй үүсгэсэн бол тухайн кодоор бүртгэсэн орлогын гүйлгээ болон эхний үлдэгдэлд оруулсан бүртгэлийг устгасны (өөрөөр хэлбэл, огт үлдэгдэлгүй болгоно гэсэн үг) дараа тухайн кодыг төрлийг Үйлчилгээ болгож хадгалах боломжтой. Тухайн кодоорх бүх орлогын гүйлгээг шүүхдээ Бараа материал -> Бараа код -> Гүйлгээ цонхноос шүүж харна. Хэрвээ орлогын гүйлгээг засах, эхний үлдэгдлийг засах боломжгүй (тайлант үе хаасан, засахад хэтэрхий олон гүйлгээ байгаа гэх мэт) тохиолдолд тухайн кодын үлдэгдлийг Дотоод зарлага цонхоор зарлага бүртгэж үлдэгдэлгүй болгоод, бараа кодоо идэвхгүй болгож хадгална. Шинээр Үйлчилгээ төрөлтэй бараа код үүсгэж цаашид ашиглана.

"Бараа төрөл"-г нэгэнт оруулсны дараа хэрэглэгч олноор өөрчлөх боломжгүй. Бараа код тус бүр руу орж нэг бүрчлэн солих боломжтой. Гэхдээ хэтэрхий олон бараа кодын төрлийг солих шаардлага үүссэн бол Даянсофт ХХК-д хандаж бараа төрлийг солих хүсэлт гарган солиулах боломжтой. Энэ тохиолдолд аль бүлгийн, ямар кодтой бараа вэ гэдэг нь тодорхой байх шаардлагатай анхаарна уу. Жишээ нь, Ус ундаа бүлгийн бүх барааг Материал төрөлтэй болгоё, Бүтээгдэхүүн бүлэгт байгаа бүх бараа кодын төрлийг Бүтээгдэхүүн болгох гэх мэт.
Бараа нэр - Бараа, үйлчилгээний нэр оруулна. Барааны нэрийг оновчтой, алдаагүй, зөв, цэгцтэй нэрлэх нь дараа нь тайлан мэдээ харах, бүртгэл хөтлөх, бүртгэлийн алдаа гаргах зэрэг асуудлаас урьдчилан сэргийлж өгөх юм.

Барааны нэрийг цэгцтэй өгөх зөвлөмжүүд:

-Эхний үсгийг томоор, бусад үсгийг жижгээр нэрлэх
-Англи, монгол зэрэг өөр өөр хэл, үсгээр хольж аль болох үүсгэхгүй байх. Зайлшгүй шаардлагатай тохиолдолд ойлгомжтой байлгах зорилгоор үүсгэж болно.
-Албан нэрийг оруулах уу, ярианы хэрэглээний нэрийг оруулах уу гэдгээ байгууллага дотроо ярилцаад аль нэгээр нь явах. Жишээ нь: Сахар гэх үү, элсэн чихэр гэх үү? гэх мэт. Аль нь илүү хэрэглэгддэг вэ гэдгийг бодолцож үзэх хэрэгтэй.
Бараа бүлэг – Барааны бүлэг сонгож оруулна. Барааг олоход хялбар байдлаар дэд бүлгүүд үүсгэж оновчтой бүлэглэх нь чухал. Жишээ нь: 1-р хоол, 2-р хоол, хүйтэн уух зүйлс, халуун уух зүйлс гэх мэт. Бараа бүлэг байхгүй шинээр үүсгэнэ. Энд дарж бүлэг үүсгэх зааврыг харна уу.
Бараа ангилал – Барааны ангиллыг сонгож оруулна. Бараа ангиллыг мөн адил бараагаа олоход хялбар байдлаар тодорхой дэд ангиллууд үүсгэж оновчтой бүлэглэж өгөх хэрэгтэй. Ийнхүү ангиллаа оновчтой бүлэглэж оруулснаар Dayansoft POS програм дээр тухайн бараанууд харагдахдаа бараа ангиллаараа ялгарч харагддаг гэсэн үг юм. Жишээ нь: Alcoholic Drinks > Whisky > Whisky Bottle (Whisky Shot) гэх мэт. Хэрвээ Dayansoft POS програм ашигладаггүй, эсвэл түүхий эд материал, хангамжийн материал зэрэг посоор зарагдахгүй бараа материал кодлон бүртгэж байгаа тохиолдолд ангилал сонгох шаардлагагүй байж болно.
Хэмжих нэгж – Бараа, үйлчилгээний хэмжих нэгжийг сонгож оруулна. Dayansoft ERP систем нь бараа материалыг зөвхөн 1 хэмжих нэгжээр хөтөлдөг. Тухайн барааг худалдан авч, үлдэгдэл хөтлөх, тоолох хэмжих нэгжээ анхнаасаа зөв сонгох хэрэгтэй. Жишээ нь, хонины мах технологи картанд тохируулахдаа граммаар тохируулах бол хэмжих нэгж дээр "Грамм" сонгож өгнө. Улмаар худалдан авалт, орц норм, зарлага бүгд тухайн сонгосон граммаар хөтлөгдөнө. Хэрэв хэмжих нэгжийг анх килограммаар бүртгэл хөтөлж байгаад шууд грамм болговол үлдэгдэл, өртөг зэрэгт нөлөөлж буруу бүртгэл болно. Хэмжих нэгж өөрчлөх бол энд дарж зааварчилгаа харна уу!
Дараалал – Dayansoft POS програм дээр тухайн ангилал дотор тухайн барааны харагдах дараалал, эрэмбийг энд оруулж өгдөг. Дараалал тохируулаагүй тохиолдолд барааны кодоороо эрэмбэлэгдэж харагдана.
Нэр /EN/ – Бараа, үйлчилгээний нэрний орчуулга оруулна. Тайлангуудыг орчуулж харах, Dayansoft DMart програмд борлуулалт харах үед энд оруулсан нэрээр харагдана.

Чеклэх сонголтуудын тайлбар:

Борлуулна - Тухайн бараа үйлчилгээг борлуулдаг бол тэмдэглэнэ. Үүнийг тэмдэглэснээр борлуулалт цонхонд харагдана. Харин тэмдэглээгүй бол сонголтонд харагдахгүй. Хэрэглэгчид энэ тохиргоог буруу бүртгэж түгээмэл алдаа гаргадаг.
Худалдан авна - Тухайн бараа, үйлчилгээг худалдан авдаг бол тэмдэглэнэ. Үүнийг тэмдэглэснээр худалдан авалт, татан авалт цонхонд тухайн барааны код харагддаг. Харин тэмдэглээгүй бол тус 2 цонхонд харагдахгүй. Хэрэглэгчид энэ тохиргоог буруу бүртгэж түгээмэл алдаа гаргадаг
Посоор борлуулна – Тухайн бараа, үйлчилгээг Dayansoft POS програмыг ашиглан борлуулдаг бол тэмдэглэнэ. Сонгоогүй тохиолдолд Посын програм дээр тухайн бараа харагдахгүйг анхаарна уу. Сонгосон Бараа ангилалд дор хаяж 1 посоор борлуулах бараа байгаа үед Посоор борлуулна автомат чеклэгддэг.
Посоор хэвлэнэ – Dayansoft POS програмаас хэвлэх эцсийн хэрэглэгчид өгөх борлуулалтын баримт дээр хэвлэх бол тэмдэглэнэ. Байгууллагын дотоод хэрэгцээнд ашиглах зорилгоор бүртгэх судалгааны үзүүлэлт, өөр бусад баримтанд хэвлэх шаардлагагүй бараа, бүтээгдэхүүн, үйлчилгээг энэ талбарыг сонгохгүй үлдээснээр баримтанд хэвлэгдэхгүй.
Kiosk - Dayansoft Kiosk програмд харагдах бараануудыг тэмдэглэнэ.
Kit item - Иж бүрдэл буюу багцанд ордог, мөн дангаараа зарагддаг бараа материалууд байдаг. Ийм барааг чеклэж тэмдэглэдэг. Дараа нь бүртгэл хөтлөхдөө иж бүрдэл, багцаар зарахдаа багцийн бараануудыг шүүж харах боломжтой болдог.
НХАТ тооцно – НХАТ буюу Нийслэл хотын албан татвар суутган төлөгч бөгөөд тухайн бараа, үйлчилгээ нь НХАТ тооцохоор хуульд заасан бол тэмдэглэнэ. НХАТ-ын тухай хуулиас НХАТ тооцох бараа, үйлчилгээг харна уу. Анхаарах зүйл: Энэхүү заалт нь зөвхөн нийслэл хотод үйл ажиллагаа явуулдаг ААН, хувь хүмүүст хамааралтай.
Сериал - Dayansoft ERP болон Dayansoft POS програмуудад тухайн барааг сериал дугаараар ялган хөтлөх бол тэмдэглэнэ. Тэмдэглэснээр Dayansoft POS програмд тухайн барааг уншуулах үед сериал дугаар утга шаардана.
Sticker хэвлэнэ – Тухайн бараа Dayansoft POS програм дээр борлуулах үед нэмэлт стикер (sticker), зааварчилгаа шошго хэвлэх бол тэмдэглэнэ. Жишээ нь, Bubble tea авах үед мөстэй, мөсгүй, чихэртэй, чихэргүй, өөр бусад нэмэлт орцтой эсэхийг сонгодог, сонгосон орц нь Sticker принтерээр хэвлэгддэг бол чеклэнэ. Харин нэмэлт орц, сонголтууд болох мөстэй, мөсгүй, чихэртэй, чихэргүй зэрэг үүсгэсэн бараа кодын хувьд чеклэхгүй. Мөн зарим бүтээгдэхүүний хувьд тухайн бүтээгдэхүүн, үйлчилгээг бэлтгэсэн хугацаа болон хэрэглэх зааварчилгааг тухайн борлуулалтыг хийх үед хэвлэж наах хэрэгцээ шаардлага гардаг. Энэ тохиолдолд тус сонголтыг тэмдэглэж, тусгай бэлдсэн загварын дагуу стикер хэвлэгддэг. Жишээ нь: -2 цагийн дотор иднэ үү. -Богино долгионы зууханд халааж болохгүй гэх мэт.
Идэвхтэй - Тухайн барааны код ашиглагддаг бол идэвхтэй, ашиглагдахаа больсон бол сонголтыг идэвхгүй болгоно. Нэгэнт гүйлгээ хийгдсэн тохиолдолд устгах боломжгүй, идэвхгүй болгож орхино.

Dayansoft ERP системийн цэс: Бараа материал -> Барааны код –> Тохиргоо

Барааны кодтой холбоотой дэлгэрэнгүй, specification мэдээллийг энэ цонхонд тохируулна.

Савлагаа – Багц буюу хайрцаг савлагаа доторх тоо хэмжээг оруулна. Эсвэл дээд хэмжих нэгж дэх тоо хэмжээг оруулна. Жишээ нь, Beer буюу пиво нь авдрандаа 24 савлагаатай ирдэг бол 24, гурил, элсэн чихэр зэрэг түүхий эд материалыг грамм буюу бага нэгжээр бүртгэх ба Савлагааны хэмжээ дээр 1000 гэж (1000 гр = 1 кг) оруулснаар худалдан авалт хийх үедээ авсан кг-н тоог “Багцийн тоо” баганад оруулах үед “Савлагааны хэмжээ”-р үржүүлж “Тоо хэмжээ” багананд зөв тоо хэмжээг тооцоолоход ашиглана.
Хэмжээ – Бараа материалын савлагаан дахь хэмжээг оруулна. Жишээ нь, архи 750 мл бол 750 г.м. Энд хэмжээг тохируулснаар дараа нь орц норм тохируулах үед “Хэмжээ” багананд харагдах ба орц норм зөв тохируулахад алдаа гарахаас сэргийлж чадна.
Жин – Тухайн барааны жинг оруулна. Хэрвээ гаалиас бараа материал татан авдаг, тухайн татан авалтын зардлыг барааны жингээр хуваарилах хэрэгцээ шаардлага байдаг тохиолдолд оруулна. Бусад тохиолдолд дэлгэрэнгүй мэдээлэл зорилгоор оруулж ашиглаж болно.
Эзэлхүүн – Тухайн барааны эзэлхүүнийг оруулна.
Загвар – Тухайн бараа ямар нэг загвартай (style, стиль, хийц) бол загварын лавлах үүсгэж сонгож оруулна.
Өнгө – Тухайн барааны өнгө будгийн лавлах үүсгэж сонгож оруулна.
Размер – Тухайн бараанд урт, өргөн, өндөр гэх мэт хэмжээс байдаг бол хэмжээний лавлах үүсгэж сонгож оруулна.
Бренд – Тухайн бараа бренд бүтээгдэхүүн бол брендийн лавлах үүсгэж сонгож оруулна.
Үйлдвэрлэгч – Бараа, бүтээгдэхүүнийг үйлдвэрлэгч байгууллагыг сонгож оруулна. Барааны кодыг үүсгэхдээ хэдийгээр нэг бүтээгдэхүүн боловч үйлдвэрлэгч тус бүрээр кодолж үүсгэх нь оновчтой. Үйлдвэрлэгчээс хамаарч тухайн бүтээгдэхүүний баркод, үзүүлэлт, spec, үнэ зэрэг олон зүйлс ялгаатай байдаг тул ялгаж бүртгэх нь оновчтой.
Баталгаа – Барааны баталгааны хугацаа, баталгаатай холбоотой нэмэлт тайлбар оруулна. Баталгааны хуудсанд хэвлэх боломжтой.
Насжилт – Барааны насжилтыг хоногоор тооцож оруулна. Тайлан - Бараа материал - Бараа материалын насжилт хяналт тайлангаас хяналт хийх боломжтой.
Specs – Барааны талаар дэлгэрэнгүй specification тодорхойлолт, дэлгэрэнгүй үзүүлэлт оруулна. Энд оруулснаар Dayansoft ERP болон Dayansoft POS програмаас хэвлэн гарах баримт дээр хэвлэх боломжтой.
FAQ – Тухайн бараатай холбоотой худалдан авагч, хэрэглэгчээс асуудаг түгээмэл асуулт, хариултыг оруулна. Мөн барааг програмд сонгох үед тухайн бараатай холбоотой санамж, зөвлөгөө зэргийг оруулж, дэлгэцэнд харах боломжтой.
Нийлүүлэгч – Тухайн барааг нийлүүлдэг харилцагчийг сонгоно.
MOQ - Minimum order quantity буюу барааг хамгийн багадаа хэдийг нийлүүлэх боломжтой, эсвэл байнга худалдан авдаг тоо хэмжээг оруулна.
НӨАТ төрөл – Тухайн бараа, үйлчилгээнд НӨАТ тооцох эсэхийг сонгоно. Хуулинд заасан (НӨАТ-ын тухай хууль ) дараах 3 ангиллаас заавал нэгийг нь сонгоно. Энэхүү тохиргооноос хамаарч Dayansoft ERP болон Dayansoft POS програм дээр борлуулалт дээр НӨАТ-н тооцоолол хийгдэнэ. Гэхдээ мэдээж хэрэг танай байгууллага НӨАТ суутган төлөгч эсэх, салбар нэгж дээрх тохиргооноос хамаарна гэдгийг анхаараарай.
1. Энгийн / НӨАТ тооцно - Доорх 2 ангилалд ороогүй бусад бүх бараа үйлчилгээ.
2. Чөлөөлөгдөх / НӨАТ-с чөлөөлнө - Хуульд заасан чөлөөлөгдөх бараа, үйлчилгээ.
3. 0 хувь хэрэглэгдэх / НӨАТ 0% - Хуульд заасан албан татварын тэг хувь хэрэглэх бараа, үйлчилгээнүүд.
  
  Анхаарах зүйл:
  - Хэрэглэгчид манайх НӨАТ суутган төлөгч биш юм чинь НӨАТ-с чөлөөлнө гэж сонгох уу? НӨАТ 0% гэж сонгох уу гэж маш олон асуудаг. Та НӨАТ-н тухай хуулиа уншаад зөв ангиллыг сонгоно уу. Энэхүү сонгосон ангиллаар НӨАТ тооцоолол системд хийгдэж www.ebarimt.mn сайт руу илгээгддэг болно. Тухайн бараа, үйлчилгээ нь “НӨАТ тооцно” сонголттой, танай байгууллага өөрөө НӨАТ суутган төлөгч биш тохиолдолд програмаас НӨАТ-гүй буюу НӨАТ 0 хувиар тооцож борлуулалтын мэдээг илгээнэ.
Нэгдсэн сан – Нэгдсэн сан: БАҮАК буюу Бараа ажил үйлчилгээний ангиллын кодыг оруулна. Энэхүү сонголт нь www.ebarimt.mn сайт дээрх улсын хэмжээнд бүртгэлтэй нэгдсэн сан юм. НӨАТ-н урамшууллын систем буюу НӨАТУС-н системд борлуулалтын мэдээллийг илгээхэд энэхүү утгыг заавал сонгохыг шаарддаг. Үйл ажиллагааны төрлөөс хамааран дараах НӨАТУС кодыг сонгон ашиглахыг зөвлөж байна.
```
* Restaurant / Ресторан - 6331000 (Рестораны бүрэн үйлчилгээтэй хоол, ундаар үйлчлэх үйлчилгээ)
* CoffeeShop / Кофешоп - 2399990 (Бусад төрлийн хүнсний бүтээгдэхүүн)
* FastFood / Түргэн хоол - 2399990 (Бусад төрлийн хүнсний бүтээгдэхүүн)              
* Karaoke / Караоке - 6331000 (Рестораны бүрэн үйлчилгээтэй хоол, ундаар үйлчлэх үйлчилгээ) 
* Retail / Дэлгүүр, жижиглэн худалдаа - 2399990 (Бусад төрлийн хүнсний бүтээгдэхүүн)
* Salon / Салон - 9729000 (Гоо сайхны бусад төрлийн үйлчилгээ)
* Pharmacy / Эмийн сан - 6227300 (Эмийн бүтээгдэхүүний төрөлжсөн дэлгүүрийн жижиглэн худалдаа)  
```
Хэрвээ нэгдсэн сангийн код тохируулаагүй тохиолдолд ebarimt хэвлэх үед "ebarimt3 (ERROR) 'Coca cola' бүтээгдэхүүний classificationCode талбарын утга хоосон байна." алдаа зааж баримт хэвлэх боломжгүй. Тус бараа кодын хувьд Нэгдсэн сангийн кодыг тохируулаад, мэдээлэл шинэчилсний дараа баримтаа дахин гаргана уу.
Татвар код - НӨАТ хуулинд заасан НӨАТ-аас чөлөөлөх, НӨАТ 0% тооцох бараа үйлчилгээний хувьд 3 оронтой ангилал кодыг оруулна. Өөрөөр хэлбэл, НӨАТ төрөл багана дээр 2 эсвэл 3 гэсэн утга оруулсан үед заавал татвар код оруулна.
External code - Дотоод кодоос гадна гадаад код буюу нэмэлт барааны код байдаг тохиолдолд энэ талбарт оруулна. Өөр систем, програмтай холбогддог, өөр бааз хооронд мэдээлэл солилцдог тохиолдолд ихэвчлэн ашиглагддаг.
Зураг - Бараа материал -> Барааны код -> Тохиргоо -> Зураг оруулах хэсэгт PNG өргөтгөлтэй зураг сонгож хадгална. Зургийг солих, устгах боломжтой. Энд тохируулсан зураг ERP системийн бусад цонх болон Dayansoft POS, Kiosk програмууд дээр харагдана.

Барааны кодтой холбоотой хэрэглэгчдийн хамгийн түгээмэл асуудаг асуултууд:

Барааны кодыг гараас оруулж болох уу? /Болно./
Бүлгээрээ ялгаж кодлож болох уу? Жишээ нь 10, 20, 30-аар эхлээд. /Болно. Тухайн бүлгийн хамгийн эхний кодыг гараас оруулж хадгалаад, дараа дараагийн кодыг үүсгэхдээ Код талбараас “Бүлгийн сүүлийн код +1 кодлох” товч дээр дарж кодлох боломжтой./

Гэхдээ бүлгээр нь кодлох зайлшгүй хэрэгцээ шаардлага байна уу, дараа нь бүртгэл хөтлөх үед кодоор барааг хайж олох уу? Нэрээр хайж олох уу, бүлгээр ялгаж кодолсноор дараа нь ямар хэрэглээтэй гэдгийг сайн бодолцож үзэх хэрэгтэй юм.
Барааны кодонд үсэг, тэмдэгт оруулж кодолж болох уу? Жишээ нь, DSFS486ER /Болно. Гэхдээ байнга гараас код оруулах ба тоон төрөл биш учраас автоматаар кодлох боломжгүй./

Код талбарын ард байрлах Засах товч дээр дарж, бүлгийн сүүлийн код+1 кодлох боломжтой. Мөн код оруулж, Хайх товч дарах эсвэл Enter товч дарж барааны кодоор хайх боломжтой.