Дотоод зарлага

---

Шинэчилсэн:2024/10/16 Унших:15 мин 17 сек

Танай байгууллагын үйл ажиллагааны онцлог, үйлдвэрлэл, үйлчилгээний бүртгэл хөтөлдөг эсэх, орц норм, технологийн картаар зарлага гаргах эсэх, ямар төрлийн дотоод зарлага бүртгэж байгаа зэргээс шалтгаалж,

• Гараар шивэх
• Борлуулалтанд үндэслэж стандарт орцоор татах
• Үйлдвэрлэлээс орлогод үндэслэж стандарт орцоор татах
• Барааны үлдэгдлээс татах
• Excel темплэйт загварын дагуу зарлагын баримтаа бэлдэж импортлох замаар шивж болно.

Хэдийгээр системд бүх боломж байгаа ч гэсэн ямар төрлийн зарлагыг ямар аргаар хийх вэ гэдгийг байгууллага дотроо сайтар ярилцан тогтож, дотоод процесс, нягтлан бодох бүртгэлийн бодлогын баримт бичиг, үйлдвэрлэлийн шат дамжлага зэрэгт уялдуулж зөв бүртгэх шаардлагатайг анхаарна уу. Ямар нэг тогтсон дүрэм, журам байхгүй тохиолдолд ажилтан солигдох, эсвэл мартаж санах зэргээс шалтгаалж нэг сард нэг янзаар, дараа сард өөр янзаар бүртгэж эцэс сүүлдээ хөл, толгой нь мэдэгдэхгүй баахан зарлага үүсгэж алдаа гаргадаг.

Dayansoft ERP системийн цэс: Бараа материал -> Дотоод зарлага -> Баримтаар, Бараагаар, Нэгтгэл Энэ цонхонд барааны дотоод зарлагын баримтыг

• Баримтаар
• Бараагаар
• Нэгтгэл тайлангаар харуулна.

Жагсаалтаас баримтын бүртгэлийг засах, excel файл руу экспортлох боломжтой. Баримт засахдаа тухайн засах мөрөн дээр 2 удаа дарах эсвэл Үйлдэл -> Засах товч дарж засвар оруулаад Хадгалах товч дарна. Жагсаалтаас нэг, нэгээр эсвэл олноор сонгож Үйлдэл -> Хэвлэх товчоор хэвлэх боломжтой. Үйлдэл -> Хэвлэх товч дарахаас өмнө Үйлдэл товчноос “Өртгөөр хэвлэх”-г чеклэснээр үнээр биш, өртгөөр хэвлэнэ.

Нэгтгэл тайлангаас дурын үзүүлэлтийг мөр, багана, нүдэнд байршуулж динамик тайлан харах боломжтой.

Dayansoft ERP системийн цэс: Бараа материал -> Дотоод зарлага -> Шинэ

Энэ цонхонд барааны дотоод зарлагын баримт бүртгэнэ. Дотоод зарлагын цонхоор:

• Түүхий эд материалын зарлага
• Үйлдвэрлэлд өгсөн материалын зарлага
• Материалын хэвийн хорогдол
• Бараа материал актлалт
• Хагарал, гэмтэл, зарлага
• Тооллогоор дутсан бараа зэрэг бусад байгууллага, хувь хүнд борлуулаагүй, бусад данс, байршил руу шилжүүлээгүй бусад бүх зарлагыг бүртгэнэ.

Нэмэхдээ жагсаалтаас Шинэ (Ctrl+N) товч дарна. Устгах, засах ажиллагаа нь бусад цонхтой ижил. Баримтын мэдээллийг Үйлдэл -> Хэвлэх товч дарж хэвлэх боломжтой. Байнга давтагддаг зарлагыг Үйлдэл -> Хувилах товчоор хувилах боломжтой.

Толгой мэдээлэл

• Огноо – Баримтын огноог оруулна.
• Дугаар – Баримтын дугаарыг оруулна. Дугаар оруулаагүй үед систем автоматаар дугаарлана.
• Харилцагч код – Харилцагчийн кодыг сонгож оруулна.
• Харилцагч нэр – Сонгосон харилцагчийн нэрийг харуулна. Байгууллагын харилцагч биш этгээд бол харилцагч сонгохгүйгээр нэрийг гараас бичиж оруулж болно.
• Утга – Баримтын утга, тайлбар бичнэ.
• Reference - Эх сурвалж, баримтын дугаар оруулна.
• Тайлбар - Нэмэлт тайлбар оруулна.

Гүйлгээний мэдээлэл

• Бараа код – Бараа, үйлчилгээний код сонгоно. Барааны кодыг оруулах эсвэл баркодоор оруулах боломжтой. Энд Үйлчилгээ төрөлтэй барааны код сонгох боломжгүй. Учир нь Үйлчилгээ төрөлтэй бараа кодын хувьд үлдэгдэл хөтлөгддөггүй. Хэрвээ Үйлчилгээ төрөлтэй, дотроо орц нормтой бүтээгдэхүүнийг зарлагадаж стандарт орцоор материалын зарлага гаргах шаардлагатай байгаа бол Борлуулалт -> Борлуулалт эсвэл Борлуулалтын захиалга цонхоор бүртгэл үүсгэж, тухайн бүртгэлээс Үйлдэл -> Үүсгэх -> Материалын зарлага үүсгэх алхмаар үүсгээрэй.
• Бараа нэр – Сонгосон барааны нэрийг харуулна.
• Бараа тайлбар - Тухайн зарлагадаж буй бараатай холбоотой нэмэлт тайлбар оруулна.
• Бараа бүлэг - Тухайн зарлагадаж буй барааны бүлэг харуулна.
• Бараа данс – Зарлагадах барааны данс сонгоно. Хэрвээ Борлуулалтаас стандарт орцоор татах, Үйлдвэрлэлээс орлогоос стандарт орцоор татах дарж дотоод зарлага үүсгэж байгаа тохиолдолд Борлуулалт, Үйлдвэрлэлээс орлогын баримт дахь Бараа дансанд тохируулсан (Ерөнхий дэвтэр -> Данс код цонхонд ТЭМ данс багананд) ТЭМ дансыг автомат бөглөж харуулна.
• Харьцсан данс – Харьцсан данс сонгоно. Ямар бүртгэл хийж буйгаас шалтгаалж зөв дансаа сонгоно. Жишээ нь, Борлуулсан бүтээгдэхүүний өртөг, Зардлын данс гэх мэт. Харьцсан дансыг бүх мөрөнд ижил болгохын тулд эхний мөрөнд дансаа сонгоод дээр нь хулганы баруун товч дараад “Доош ижил” товч дарна. Харьцсан данс дээр өглөг, авлага гэх мэт тооцооны данс шууд сонгож болохгүй бөгөөд шалтгаан болон хэрхэн тооцоо үүсгэх талаар ЭНД дарж дэлгэрүүлж уншина уу.
• Үлдэгдэл – Барааны үлдэгдлийг баримтын огноогоор тооцоолж харуулна. Материал, Бэлэн бүтээгдэхүүн төрөлтэй барааны кодын хувьд үлдэгдэл харуулна. Зарлагадаж буй тоо хэмжээ үлдэгдлээс хэтэрсэн тохиолдолд Үлдэгдэл улаанаар харагдах бөгөөд хадгалах үед анхааруулга мессэж өгнө.
• Савлагаа тоо – Савлагаа тоо хэмжээг оруулна.
• Савлагаа – Савлагаа талбарын утгыг харуулна.
• Тоо хэмжээ – Тоо хэмжээг оруулна.
• Нэгж – Хэмжих нэгжийг харуулна.
• Үнийн жагсаалт – Үнийн жагсаалт сонгож оруулна. Үндсэн тохиргоо -> Харилцагч -> Тохиргоо цонхонд үнийн жагсаалт тохируулсан бол тухайн үнийн жагсаалтыг дуудаж харуулна.
• Нэгж үнэ – Бараа, үйлчилгээний нэгжийн үнийг оруулна.
• Нийт дүн – Бараа, үйлчилгээний нийт үнийг оруулна.
• Нэгж өртөг – Бараа, үйлчилгээний нэгжийн өртгийг тооцоолж харуулна. Гараас утга оруулах, өөрчлөх боломжгүй. Өртөг бодуулсны дараа утгатай харагдана.
• Нийт өртөг – Бараа, үйлчилгээний нийт өртгийг тооцоолж харуулна. Гараас утга оруулах, өөрчлөх боломжгүй. Өртөг бодуулсны дараа утгатай харагдана. Өртөг бодох заавар харна уу.
• Сүүлд авсан үнэ – Тухайн бараа материалыг сүүлд орлогод авсан үнийг харуулна.
• Гэрээ код – Аль гэрээний дагуу бараа материалыг зарлага хийж байгааг сонгож оруулна. Дараа гэрээгээр зарлагын тайлангаас шүүж харах боломжтой.
• Ажил код - Аль ажлын бараа материалыг зарлага хийж байгааг сонгож оруулна. Дараа ажлаар зарлагын тайлангаас шүүж харах боломжтой.
• Бүтээгдэхүүн – Бэлэн бүтээгдэхүүн үйлдвэрлэхэд хийсэн түүхий эд материалын зарлага бүртгэсэн тохиолдолд бэлэн бүтээгдэхүүнийг энд сонгоно. Дараа нь аль бүтээгдэхүүнд, аль түүхий эд материал орсныг тайлангаас шүүж харах боломжтой.
• Бүтээгдэхүүн тоо - Тухайн материалын зарлагад ноогдох бэлэн бүтээгдэхүүний тоог оруулна. Нэгж бүтээгдэхүүнд оногдох материалын зарлагыг тооцоход ашиглагддаг.

Dayansoft ERP системийн цэс: Бараа материал -> Дотоод зарлага -> Мета

Энэ цонхонд Дотоод зарлагын бүртгэлтэй холбоотой нэмэлт дэлгэрэнгүй мэдээллийг бүртгэнэ. Нэмэлт мэдээлэл бүртгэхийн тулд Үндсэн тохиргоо -> Мета цонхонд урьдчилан бүртгэл хийх мэдээллийг бүртгэж тохируулсан байх шаардлагатай.

Бараа материал -> Дотоод зарлага цонхноос Үйлдэл товч дарж

• Борлуулалт үүсгэх товч дарахад тус бүртгэлийн цонхонд шинэ горимд бараа, бусад мэдээллийг хуулагдах ба бүртгэлийг хялбар үүсгэх боломжтой.

Борлуулалтаас стандарт орцоор ТЭМ зарлагадах

Dayansoft ERP системийн цэс: Бараа материал -> Дотоод зарлага -> Шинэ -> Үйлдэл -> Борлуулалтаас стандарт орцоор татах

Dayansoft ERP системд бүтээгдэхүүн, үйлчилгээнд тохируулсан орц норм, технологийн картаар түүхий эд материалын зарлагыг хэрэглэгч үйлдэл хийгээгүй байх үед өөрөө “АВТОМАТААР ОГТ ХИЙДЭГГҮЙ!”. Бүтээгдэхүүн, үйлчилгээний бизнес эрхэлж буй, ялангуяа ресторан, хоолны газар, кофешоп зэрэг үйлчилгээний салбарын эзэд, нягтлан бодогчид бүгд л “ЯАГААД АВТОМАТ ХИЙГДДЭГГҮЙ ЮМ. АВТОМАТААР ХИЙГДДЭГ БАЙХ ЁСТОЙ!” гэдэг.

Түүхий эд материалын зарлагыг автоматаар хийхгүй байх маш олон үндэслэл, шалтгаан байна. Заримаас нь дурдвал:

• Бүтээгдэхүүн, үйлчилгээний стандарт орц нормыг тохируулах нь маш энгийн боловч бодит амьдрал дээр түүнийг ягштал мөрдөж, хэрэгжүүлэх нь маш хэцүү, бараг боломжгүй зүйл юм. Нэг ширхэг хоол хийхэд л зөрүү үүсч эхэлдэг, өдөрт хэдэн зуу, мянган ширхэгээр хийх үед тухайн зөрүү дагаад ихэсч эхэлдэг.
• Энэ салбарт олон жил ажилласан туршлагатай нягтлан бодогч, аудитор хүмүүсийн зөвлөгөөг харахад орц нормоор автомат зарлага хийхийг зөвлөдөггүй. Мэдээж хэрэг орц нормоо оруулаад орцын хэтрэлт, хэмнэлтийн хяналт, гэнэтийн тооллого зэргээр хянахыг илүү зөвлөдөг.
• Энэ чиглэлийн програм хангамж олон жил хөгжүүлсэн туршлагатай компаниудын өмнө хөгжүүлж туршсан, одоо байгаа програмуудаас харахад автомат зарлага хийдэг програмын давуу тал нь автомат зарлага хийдэггүй програмаас цөөн, эсрэгээрээ дутагдалтай тал нь илүү байдаг.
• Орц нормын илүү тохиргооноос шалтгаалж материалын хий зарлага, буцаад сарын эцэст хий орлого үүсэх тохиолдол гардаг.
• Хий зарлагад үндэслэж материалын үлдэгдлээ дуусчихсан, эсвэл байгаа мэтээр буруу мэдээлэлтэй явдаг.
• Хий зарлага, хий орлогоос шалтгаалж компаний дотоод ажилтнууд хоорондоо үл ойлголцох, ажилтнууд удирдлагатай үл ойлголцох тохиолдол гардаг. Улмаар ажлаас халах, чөлөөлөгдөх ч тохиолдол үүсч болно.

Хэдийгээр түүхий эд материалын зарлагыг програм автоматаар хийхгүй боловч хэрэглэгч хүссэн үедээ, дурын хугацаагаар хэдхэн товч дараад л зарлагаа хийж, үлдэгдлээ шахах боломжтой. 1 минутын дотор л хийх боломжтой бөгөөд автоматаар хийснээс илүү хэрэглэгч өөрөө нүдээрээ хянаад, өөрийн гараар баталгаажуулж хийнэ гэсэн үг. Ер нь хүний нүдэнд харагдахгүй үйлдэл хийлгүй, өөрт нь

• ямар барааг,
• хэд үлдэгдэлтэй байхад нь
• хэдийг,
• хэзээ зарлагадаж байгааг нь харуулаад зарлагын бүртгэлийг хадгалуулж байна гэж ойлгож болно.

Борлуулалтын бүртгэлд үндэслэж технологийн картын орц нормын задаргаа хийхдээ Бараа материал -> Дотоод зарлага -> Шинэ -> Борлуулалтаас стандарт орцоор татах товч дарна. Дараах цонх нээгдэх ба эхний баганад борлуулалтын баримтууд сонгоно.

• Эхлэх огноо - Дуусах огноо - Ямар хугацааны хооронд хийсэн борлуулалтын баримтанд үндэслэж орц нормын зарлага хийхийг тохируулна.
• Бүтээгдэхүүнээр ялган татна - Хэрвээ түүхий эдийн зарлагыг гаргахдаа тухайн түүхий эд материал яг аль бүтээгдэхүүнд орсноор ялгаж зарлагаа хийх тохиолдолд чеклэж сонгоно. Жишээ нь, Чеклэсэн тохиолдолд хонины мах цуйванд, хонины мах гуляшанд ямар хэмжээгээр орсон нь тусдаа мөр болж үүснэ.
• Орц - Түүхий эдийн зарлагыг хийхдээ
  • тогтмол,
  • тогтмол биш,
  • Бүгд сонголтоос хийж зарлагадах боломжтой. Жишээ дурдвал, компаниуд ихэвчлэн текний орц нормыг тогтмолоор тохируулж, гал тогооны орцыг тогтмол бишээр тохируулдаг. Дараа нь текний хувьд зарлагаа стандартаар хийх, гал тогооны зарлагаа стандартаар хийх гэж салгаж болно. Тогтмол, тогтмол бишийн талаар дэлгэрэнгүйг ЭНД дарж уншина уу.
• Төрөл - Түүхий эдийн зарлагыг хийхдээ
  • Бүтээгдэхүүн
  • Үйлчилгээ буюу барааны кодын төрлөөс сонгож зөвхөн тухайн сонгосон төрөлтэй барааны кодуудын хувьд дотоод зарлагыг хийх боломжтой. Жишээ нь, үйлдвэрлэлийн бүртгэл хөтөлдөг харилцагч байгууллагын хувьд үйлдвэрлэсэн бэлэн бүтээгдэхүүн, хагас боловсруулсан бүтээгдэхүүний орц, түүхий эд материалын зарлага аль хэдийнэ бүртгэгдсэн тул борлуулалтаас зарлага гаргах үедээ зөвхөн Үйлчилгээ төрлөө сонгож дотоод зарлагаа гаргана.

Борлуулалтын цонхоор хийсэн борлуулалтын баримтаа үнэгүй буюу 0 үнэтэй, хөнгөлснөөр ялгах, захирал удирдлагын дотоод хэрэгцээний зардал, хүлээн авалтын зардал, ажилтнуудын хоолны хөнгөлөлт зэргээр ялгаж тухайн түүхий эд материалын зарлагыг аль данс руу бичих вэ гэдэг асуудал гарч ирдэг. Өөрөөр хэлбэл, бүх түүхий эд материалын зарлагыг үндсэн борлуулсан бүтээгдэхүүний өртөг дансанд хийхгүй, өөр данс руу ялгаж бичих хэрэгцээ шаардлага, бизнес хэрэглээ үүсдэг. Энэ тохиолдолд дараах ангиллаар ялгаж, аль данс руу бичихийг тохируулаад зарлагаа хийх боломжтой.

• Үндсэн борлуулалт ББӨ - Борлуулалтын цонхонд үндсэн үнээр борлуулсан буюу үнэгүй, 100 хувь хөнгөлснөөр бусад бүх борлуулалтын хувьд түүхий эдийн зарлагыг энд сонгосон данс руу зарлагадана.
• 0 үнэтэй борлуулалт ББӨ - Борлуулалтын цонхонд тэг буюу 0 үнээр борлуулсан борлуулалтын хувьд түүхий эдийн зарлагыг энд сонгосон данс руу зарлагадана.
• 100% хөнгөлөлтийн ББӨ - Борлуулалтын цонхонд 100 хувь хөнгөлсөн борлуулалтын хувьд түүхий эдийн зарлагыг энд сонгосон данс руу зарлагадана.

Эдгээрийг сонгоод “Сонгох” товч дарахад борлуулалтын баримтанд үндэслэж, орц нормоорх зарлагыг тооцож, Дотоод зарлага цонхонд бөглөж харуулна. Нягтлан бодогч та өөрөө зарлагын баримтаа нягтлаад, засах, солих (дууссан түүхий эдийг өөр түүхий эдээр орлуулсан) үйлдлээ хийгээд Журнал хэсэгт Бичих дарж журналаа үүсгээд зарлагын баримтаа хадгална. Дотоод зарлагын цонх болон журнал хэсэгт өртөг нь өртөг бодуулсны дараа харагдахыг анхаарна уу.

Автоматаар хийдэггүй гээд байгаа үйлдлийг хийхэд ердөө л дээрх үйлдлийг хийхэд гараар хялбархан хийчихнэ. Ердөө л 1 минутанд хангалттай хийчих үйлдэл. Дээр нь илүү хяналттай, найдвартай.

За дээрх заавраар борлуулалсан бараа үйлчилгээний хувьд тохируулсан орц нормоор орц, түүхий эд материалын зарлагаа гаргах үед буруу татаад байна, зөрүүтэй татаад байна гэсэн дуудлага их ирдэг. Энэ тохиолдолд та дараах зааврын дагуу шалгаарай.

Тайлан -> Үйлдвэрлэл -> Материалын зарлагын хяналт тайланг зарлагын хугацаагаар зөв шүүж Зарлага сонголтонд Борлуулалт сонгоод Харах дарна.

Гарч ирсэн тайлан дараах байдалтай харагдах ба борлуулалтын баримтаас тохируулсан орц нормоор тооцож зарлагадах тоо хэмжээг Стандарт орц багананд харуулна. Бодит зарлага-г хийсэн цонх тус бүрээр ялгаж харуулна.

Шалгах бараа кодын Стандарт орц баганын цэнхэр тоо дээр дарж тухайн түүхий эд материал, бараа ямар ямар бүтээгдэхүүн, үйлчилгээнд ямар орц хэмжээгээр нийт хэдэн ширхэг борлуулагдаж нийт зарлага тооцоологдсоныг хянах боломжтой байдаг.

Үйлдвэрлэлээс орлогоос стандарт орцоор ТЭМ зарлагадах

Dayansoft ERP системийн цэс: Бараа материал -> Дотоод зарлага -> Шинэ -> Үйлдэл -> Үйлдвэрлэлээс орлогоос стандарт орцоор татах

Dayansoft ERP системд бүтээгдэхүүн, үйлчилгээнд тохируулсан орц норм, технологийн картаар түүхий эд материалын зарлагыг хэрэглэгч үйлдэл хийгээгүй байх үед өөрөө “АВТОМАТААР ОГТ ХИЙДЭГГҮЙ!”.

Хэрвээ танай байгууллага үйлдвэрлэлийн бүртгэлээ хөтлөхдөө үйлдвэрлэлд түүхий эд материалаа өгөхдөө бус, үйлдвэрлэж бэлэн болсон бүтээгдэхүүний тоо хэмжээндээ тааруулж түүхий эдийн зарлагаа хийх бизнес хэрэгцээ шаардлага байдаг бол дараах зааврын дагуу дотоод зарлагаа хийнэ үү.

Бараа материал -> Дотоод зарлага -> Шинэ -> Үйлдвэрлээс орлогоос стандарт орцоор татах товч дарна. Дараах цонх нээгдэх ба эхний баганад үйлдвэрлэлээс орлогын баримтууд сонгоно.

• Хугацаа
• Салбар
• Орцын төрөл (Тогтмол, тогтмол биш, Бүгд)

Хамгийн хялбараар зөвхөн хугацаагаа оруулаад сонгож болно.

• Эхлэх огноо - Дуусах огноо - Ямар хугацааны хооронд авсан үйлдвэрлэлээс орлогын баримтанд үндэслэж орц нормын зарлага хийхийг тохируулна.
• Бүтээгдэхүүнээр ялган татна - Хэрвээ түүхий эдийн зарлагыг гаргахдаа тухайн түүхий эд материал яг аль бүтээгдэхүүнд орсноор ялгаж зарлагаа хийх тохиолдолд чеклэж сонгоно.
• Орц - Түүхий эдийн зарлагыг хийхдээ
  • тогтмол,
  • тогтмол биш,
  • Бүгд сонголтоос хийж зарлагадах боломжтой. Жишээ дурдвал, компаниуд ихэвчлэн текний орц нормыг тогтмолоор тохируулж, гал тогооны орцыг тогтмол бишээр тохируулдаг. Дараа нь текний хувьд зарлагаа стандартаар хийх, гал тогооны зарлагаа стандартаар хийх гэж салгаж болно. Тогтмол, тогтмол бишийн талаар дэлгэрэнгүйг Үйлдвэрлэл -> Стандарт орц норм цонхны заавраас уншина уу.

Эдгээрийг сонгоод “Сонгох” товч дарахад үйлдвэрлэлээс орлогын баримтанд үндэслэж, орц нормоорх зарлагыг тооцож, Дотоод зарлага цонхонд бөглөж харуулна. Нягтлан бодогч та өөрөө зарлагын баримтаа нягтлаад, засах, солих (дууссан түүхий эдийг өөр түүхий эдээр орлуулсан) үйлдлээ хийгээд зарлагын баримтаа хадгална.

Автоматаар хийдэггүй гээд байгаа үйлдлийг хийхэд ердөө л дээрх үйлдлийг хийхэд гараар хялбархаан хийчихнэ. Ердөө л 1 мин-д хангалттай хийчих үйлдэл. Дээр нь илүү хяналттай, найдвартай.

Барааны үлдэгдлээр дотоод зарлага

Dayansoft ERP системийн цэс: Бараа материал -> Дотоод зарлага -> Шинэ -> Үйлдэл -> Барааны үлдэгдлээс татах

Хэрвээ тухайн нэг хугацаагаарх бараа материалын данс дахь бүх бараа материалын үлдэгдлийг бүгдийг нь дотоод зарлага цонхоор зарлагадах, өөрөөр хэлбэл, 0 үлдэгдэлтэй болгох бизнес хэрэгцээ шаардлага гарсан бол дараах зааврын дагуу дотоод зарлагаа хийнэ үү.

Бараа материал -> Дотоод зарлага -> Шинэ -> Барааны үлдэгдлээс татах товч дарна. Гэхдээ энэ цонх руу орохоос өмнө Дотоод зарлагын цонхонд зарлага хийх огноогоо урьдчилан сонгох ёстойг анхаарна уу. Сонгосон огноогоорх үлдэгдлийг систем тооцож харуулна.

Барааны үлдэгдлийг огноогоор шүүж харахдаа

• Салбар нэгж
• Бараа данс
• Бараа бүлэг
• Барааны кодоор шүүж, ялгаж дуудах боломжтой.

Зарлагадах бараануудаа жагсаалтаас сонгоод “Сонгох” товч дарна. “Сонгох” товч дарахад тухайн огноогоорх сонгосон бараануудыг, үлдэгдэл тоо хэмжээгээр Дотоод зарлага цонхонд бөглөж харуулна. Нягтлан бодогч та өөрөө зарлагын баримтаа нягтлаад, засах, солих үйлдлээ хийгээд зарлагын баримтаа хадгална.

Дотоод зарлагаар тооцоо үүсгэх (ажилтанд, харилцагчид)

Дотоод зарлага цонхоор бүртгэл хөтлөөд харьцсан дансан дээр авлага, өглөг үүсгэсэн бичилт хийх гэхээр харьцсан дансан дээр авлага, өглөгийн данс байхгүй байна гэсэн асуулт их ирдэг. Дотоод зарлагаар тооцооны данстай харьцсан бичилт хийж болохгүй. Учир нь дотоод зарлага дээр програмаас өртөг бодогдоно. Тиймээс түр дансаар дамжуулан, давхар журнал бичилтээр бичнэ. Түр данс нь ямар данс байхыг нягтлан бодогч та өөрөө шийднэ. Гэхдээ ихэнх байгууллагууд “Бусад зардал” гэсэн дансаар дамжуулдаг. Дотоод зарлагын цонхонд харьцсан дансанд шууд тооцооны данс сонгож болдог програмуудын хувьд цаанаа тухайн түр дансыг хэрэглэгчид харуулалгүйгээр тохируулсан байдаг бөгөөд ялгаагүй л өртгийн зөрүү тухайн түр дансанд үүсч, хаалтын бичилтээр хаагдаж байдаг юм.

Жишээ нь: Болор ХХК-д өглөгтэй байсан ба бараа материалаар өглөгөө хаасан. Энэ тохиолдолд Бараа данс: Хангамжийн материал, Харьцсан данс нь: Бусад зардал сонгоод бараа, тоо ширхэг, үнийн дүнг оруулаад журнал холбох дарна.

Журнал холбох дарахад:

Хангамжийн материал Кт, Бусад зардал Дт-ийн дүн 0 журнал бичилт үүснэ. Энэ дүн өртөг бодсоны дараа автоматаар бодогдож тавигдана.

“Нэмэх” товч дараад 2-р багц гүйлгээнд:

Бусад зардал Кт, Дансны өглөг Дт үнийн дүн оруулаад хадгална. Тухайн бараагаар хэдэн төгрөгний өглөг хааж байгааг гараас дүнгээ оруулна.

Бараа материал хагалсан, дутаасан ажилтанд тооцоо үүсгэх тохиолдол мөн дээрх кейстэй яг ижил. Ялгаа нь гэвэл Дансны өглөг дансны оронд Ажиллагсдаа авах авлага, Харилцагч дээр тухайн ажилтанг сонгож өгнө. Анхаарах зүйл: Гараас оруулсан дүн, програмаас тооцсон өртгийн дүн 2-н хооронд зөрүү үүсэх боломжтой бөгөөд үүссэн зөрүү нь дамжуулсан түр данс дээр үлдэж, тайлант үе хаах үед орлого, зардлын аль нэгээр хаалт хийгдэнэ.

Бараа материалыг хөрөнгө рүү шилжүүлэх

Бараа материалыг үндсэн хөрөнгө болгох, эсрэгээр үндсэн хөрөнгөө бараа материал болгож борлуулах бизнес хэрэгцээ гардаг. Энэ тохиолдолд дараах байдлаар бүртгэлээ хөтөлнө.

1. Бараа материал -> Дотоод зарлага цонхонд шилжүүлэх бараа материалаар зарлагын бүртгэл хийнэ.
   • Дотоод зарлагаар тооцооны данстай харьцсан бичилт хийж болохгүй. Учир нь дотоод зарлага дээр програмаас өртөг бодогдоно. Тиймээс түр данс сонгож журнал бичнэ. Түр данс нь ямар данс байхыг нягтлан бодогч та өөрөө шийднэ. Гэхдээ ихэнх байгууллагууд “Бусад зардал” гэсэн дансаар дамжуулдаг. Дотоод зарлагын цонхонд харьцсан дансанд шууд тооцооны данс сонгож болдог програмуудын хувьд цаанаа тухайн түр дансыг хэрэглэгчид харуулалгүйгээр тохируулсан байдаг бөгөөд ялгаагүй л өртгийн зөрүү тухайн түр дансанд үүсч, хаалтын бичилтээр хаагдаж байдаг юм.
2. Бараа материал -> Өртөг бодох цонхонд өртөг бодуулна. Зардлагадсан бараа материалын өртгийг зөв тооцсон байх шаардлагатай.
3. Үндсэн хөрөнгө -> Хөрөнгийн код цонхонд хөрөнгийн код үүсгэж бүртгэнэ.
4. Үндсэн хөрөнгө -> Хөрөнгийн орлого цонхонд хөрөнгийн орлого бүртгэнэ. Хөрөнгийг НӨАТ-гүй дүнгээр орлогод бүртгэнэ. Ямар дүнгээр бүртгэхийг нягтлан бодогч та шийдэх ба 2-р алхамд бодуулсан бараа материалын өртөг болон орлогод авсан дүн зөрүүтэй тохиолдолд журнал бичсэн түр дансанд үлдэж, хаалтын бичилтээр хаагдана.

Эсрэгээр хөрөнгөө бараа материал руу шилжүүлэх тохиолдолд:

1. Үндсэн хөрөнгө -> Хөрөнгийн элэгдэл цонхоор шилжүүлэх хөрөнгөө сонгож элэгдэл тооцно.
2. Үндсэн хөрөнгө -> Хөрөнгө зарлага цонхоор шилжүүлэх хөрөнгөө зарлага бүртгэнэ. Түр данс руу бичилт хийнэ. Түр данс нь ямар данс байхыг нягтлан бодогч та өөрөө шийднэ. Ихэнх байгууллагууд “Бусад зардал” гэсэн дансаар дамжуулдаг.
3. Бараа материал -> Бараа код цонхонд шинээр барааны код үүсгэж бүртгэнэ.
4. Бараа материал -> Дотоод орлого цонхоор бараа материалаа орлогод бүртгэх ба 2-р алхамд бүртгэсэн түр данснаас орлого авна. Дүн зөрүүтэй тохиолдолд журнал бичсэн түр дансанд үлдэж, хаалтын бичилтээр хаагдана.

Бараа код нэгтгэх, хөрвүүлэх

Бараа материалын кодыг давхардуулж бүртгэснээс тухайн 2 кодыг нэгтгэх эсвэл нэг барааг нөгөө рүү хөрвүүлэх (хайрцаг савлагаатай бүтээгдэхүүнийг задлаж ширхгийн код руу хөрвүүлэх) бизнес хэрэгцээ гардаг. Энэ тохиолдолд дараах байдлаар бүртгэлээ хөтөлнө.

Бараа код нэгтгэх

1. Бараа материал -> Дотоод зарлага цонхонд тухайн нэгтгэх барааг үлдэгдлээр нь зарлагын бүртгэл хийнэ.
   • Дотоод зарлагаар тооцооны данстай харьцсан бичилт хийж болохгүй. Учир нь дотоод зарлага дээр програмаас өртөг бодогдоно. Тиймээс түр данс сонгож журнал бичнэ. Түр данс нь ямар данс байхыг нягтлан бодогч та өөрөө шийднэ. Гэхдээ ихэнх байгууллагууд “Бараа хөрвүүлэг” гэсэн туслахгүй бараа материалын данс шинээр үүсгэж, тус дансаар дамжуулдаг. Дотоод зарлагын цонхонд харьцсан дансанд шууд тооцооны данс сонгож болдог програмуудын хувьд цаанаа тухайн түр дансыг хэрэглэгчид харуулалгүйгээр тохируулсан байдаг бөгөөд ялгаагүй л өртгийн зөрүү тухайн түр дансанд үүсч, хаалтын бичилтээр хаагдаж байдаг юм.
2. Бараа материал -> Өртөг бодох цонхонд өртөг бодуулна. Зардлагадсан бараа материалын өртгийг зөв тооцсон байх шаардлагатай.
3. Зарлага бүртгэсэн бараа материалыг Бараа материал -> Бараа код цонхонд Идэвхтэй чекийг авч хадгална. Ингэснээс цаашид бүртгэлийн цонхнуудад тус код сонголтонд харагдахгүй.
4. Бараа материал -> Дотоод орлого цонхоор нэгтгэх бараа материалаа орлогод бүртгэх ба 2-р алхамд бүртгэсэн түр данснаас орлого авна. Дүн зөрүүтэй тохиолдолд журнал бичсэн түр дансанд үлдэж, хаалтын бичилтээр хаагдана.

Бараа код хөрвүүлэх

Зарчмын хувьд бараа код нэгтгэхтэй ижил. Ялгаатай зүйл нь,

• 1-р алхамд бүх үлдэгдлээр зарлага бүртгэхгүй, зөвхөн хөрвүүлэх тоо хэмжээгээр зарлага бүртгэнэ.
• 3-р алхамд бараа кодыг идэвхгүй болгохгүй.

Орцоор зарлага дахь оронгийн нарийвчлал

Dayansoft ERP системд тоо хэмжээ талбарын бутархай оронгийн нарийвчлал нь 6 орон байдаг. Өөрөөр хэлбэл, 45.546879 гэх мэт цэгээс хойш 6 оронгоор тасалбар болгодог. Борлуулсан, үйлдвэрлэсэн бүтээгдэхүүний тоо хэмжээнд үндэслэн тохируулсан орц нормоор зарлага үүсгэх үед тоо хэмжээ нь 6 оронгоос илүү оронгоор нарийвчлан тооцох шаардлага гардаг. Мөн тухайн дансанд байгаа барааг үлдэгдлээр нь зарлагадах үед үлдэгдэл тоог шууд гараас оруулж болно. Энэ тохиолдолд хэдийгээр бүхэл орон болон бутархай 6 орон ижил харагдаж байгаа боловч 7 дахь оронгоос хойш ялгаатай тоо байгаа тохиолдолд нүдээр харагдаж байгаа тоо хэмжээ ижил боловч зарлага хийх үед хасах үлдэгдэл үүсч байгаа талаар анхааруулга гардаг.

Энэ тохиолдолд тухайн мөр дээр хулганы баруун товч дараад Үйлдэл -> “Тоо хэмжээ = Үлдэгдэл” товч дараад дотоод зарлагаа хадгална.

Энэ функц Дотоод хөдөлгөөний цонхонд мөн адил байгаа.

---